LA VUCI DI ROSA 
(Omaggio a Rosa Balistreri) 
La vuci di Rosa 
rumpeva li catini, 
sciogghieva i gruppa 
c'attaccanu 'i pinzeri, 
grapeva 'i porti da vicaria 
unni tinemu carzarati 'i sonni. 
La vuci di Rosa 
avìa 'a caluria du suli... 
a friscura di 'acquazzina 
di 'na matinata d'aùstu... 
t'ammugghiàva comu sciroccu, 
t'annacava comu 'na matri, 
matri di 'sta terra di focu 
c'addatta 'i figghi 
cu palori chi nascinu du cori. 
Rosa, la licatisi, 
ciuri di Sicilia 
spuntatu pi suvirchiarìa 
ntra tròffa di ddisa e spini.