LU DUI NUVEMBRI
Lu dui novembri, comu ogni annu,
vaiu a visitari li me morti.
Puliziu la balata, mettu li ciuri frischi na li vasi
e recitu cuntritu l'orazziuni.
Poi, comu facivu di picciriddu,
mi mettu a zanniari balati balati
scurrermu cu l'occhi l'epitafi:
"Qui giace... i figli affranti posero".
Mentri li me pinseri vulanu ntra li morti,
ntisi un murmuriu, comu n'alaò tristi,
ca vineva di n'agnuni, 
unni ci sunnu li posti a muru.
Arrunchiata na siggitedda,
comu na crucchiulidda,
na giuvani fimmina ca prjava:
"Patri Nostru …" M'incugnai
vitti scrittu nta la balata:
"Qui' riposa il corpo d'un lavoratore,
padre e marito devoto
ucciso dalla crisi e dal lavoro".
Picchi sti palori? Mi dummannai curiusu
e scusannumi ci dumannai:
"Signura chi voli diri stà scritta?"
Isa la testa, mentri un giummu di capiddi,
di sutta lu velu nivuru, si sfila di lu tuppu.
Cu la manu, bianca comu latti,
li metti a postu cu un firrettu
e taliannu lu celu mi rispunniu:
"'Mi dissuru ca fu disgrazia, 
ma disgrazia nun fu.
Picchi, pi un omu ca ama la famigghia,
nun avennu dinari na li sacchetti,
s'accetta qualunqui travagghiu,
puru senza elmettu, mbracatura c prutiziuni;
si chiudinu l'occhi e si travagghia
pi deci e passa uri e nun si talia nenti.
U pani, puru duru, é sempri pani,
Accussi succedi la disgrazia. ..
ma chista disgrazia nun é !".
Li vrazza jsa all'aria comu affirrari 
qualchi cosa, resta senza ciatu,
aggiarnia, cala li vrazza e s'assetta
comu ghiommaru aggruppatu
e ripigghia a sfilari la litania:
"... ca si 'nna ni celi".
Lu cori mi squagghiò comu cira a lu suli.
Pinsai:
quannu lacrimi mancianu lacrimi,
si nutrica lu duluri e si figghia raggia.
Vulevu darici cunsolu,
a st'arma afflitta e scunsulata,
pi sta cruci dulurusamenti purtata.
Ma li palori s'astutanu
davanti a sti morti
ca nun fannu scrusciu,
ca passanu silinziusi
senza lassari signu
comu l'acqua di li ciumi
ntra lunni di lu mari.
Sti morti "bianchi" lassanu comu eredità
lacrimi salati e panzi vacanti.
Li chiancinu, 'mpassuluti di duluri,
sulu figghi, matri e muggheri.