LU CANNOLU
DI LA "STRADA ULETTA"

Lu vecchiu cannolu di la "Strada Uletta"
quannu allammicu mi riporta a la menti
dopu tant'anni chi oramai cchiu nun senti
vrazza di mamma li panni sciaqquari
e ghinchiri d'acqua li quati e li quattari.

Mamma! Chi ti susivi prima d'aghiurnari
comu pannitteri chi va a lu furnu
e ghinchiri d'acqua li caputi pi lu iornu
prima chi nforza la fudda a lu cannolu.
Priparavi pi li figghi
lu pani e la cutugnata
stanca e a avviluta pi la solita matinata.

O funtanedda mia ormai siccagna
unni acqua cchiu nun scurri!
Asciughi di lu cori lu sintimentu
siccornu amorfu è lu culuri di l'asfaltu
chi attuppa di bitumi l'anticu basulatu
e senza ritegnu addummisci la passioni!
un c'è cchiù nenti di la me infanzia
chi passava senza fretta
quannu stavu a lu cannolu
di la me cara "Strada Uletta"!