MAGICA NUTTATA 

Sirena e stiddìata è la notti, 
ciaurusa di fragranzi saracini; 
lucicchia lu mari o chiaru di luna 
e lu cantu di li griddi fa cuncertu.
Sutta 'sta miludia s'aggivigliaru 
i lustrusi cannileddi du picuraru 
e, comu tanti gucciddi di luna, 
brillìanu, ni lu ruvettu, a una, a una.
Ogni stidda, vistuta, già, d'argentu, 
di 'rrasu, fa lucenti u firmamentu 
e, unni lu celu pari ca s'appanna, 
stiddìa lu violu di Sant'Anna.
Mentri l'onda juculìa cu lu mari 
e u gabbianu, già, si sonna di vulari, 
'stù zifireddu friscu e dilicatu 
annaca 'na varcuzza cu u so ciatu.
Ciatuliannu, porta 'ccà, di quarchi 'bbanna, 
l'ecu lentu di st'antica ninna-nanna: 
"E - a - la - vò, la - ninnaredda, 
lu lupu si mangia la picuredda..."
E' nà nuttata magica, o Signuri!
E' 'ncantu ca mi porta a 'ttìa Criaturi!
S'ammuccia, spaisatu,ogni rancuri, 
s'accuieta, cunurtatu, ogni duluri; 
o sirenu, s'addurmiscinu li ciuri 
e s'aggiviglia a magia di l'Amuri!