LA PUVIRTÀ

Ogni jornu viju si ci su nuvità
e lu paisi taliu attentamenti,
ogni sira m'addugnu tristimenti
ca comu ieri nenti cancià.

Li strati sempri chini di pirtusa
la genti è sempri cchiù dispirata
lu viddranu ca campa a la jurnata
stringi la cigna e la vucca teni chiusa.

Arraggia l'arma a pinsari
la ricchizza dei putenti
e vidiri comu mori di fami tanta genti,
taliari na matri dispirata
ca u n'avi chi dari
a la so figlia amata.

Un patri si teni la testa tra li mani
chianciennu pensa all'unnumani
priannu na grazia
c'addumanna a lu Signuri
"Un pusticieddru pi spamari
sti criaturi!"