VITA DI CAMPAGNOLU

Ricordu quantu voti carusiddu
durmeva dintra 'n misiru pagghiaru
pri matarazzu quattro erbi sicchi
'n saccu di juta comu cuvirtura
pri putiri a lu megghiu ripusari
stancu di na jurnata a la campia.
Senza lumera, sulu, a scuru fittu
pari la notti nun finiva mai,
lu cantu di lu risignolu,
lu sgrusciu d'ogni cosa
mi facìa ccu li sensi appisi
finu ca la chiaria
spaccava l'arba di lu novu jornu.
…E quantu ni passai nuttati sani
tirannu lu carrettu a pettu chinu,
pri lu vadagnu di 'n pezzu di pani
di 'n ghiornu senza arba e senza suli.
Cumpaniggiava tra miseria e fami
putìa accattari sulamenti fumu,
la sira pri mangiata
'na mininistredda stritta
'n bicchireddu di vinu e pani duru:
e puru ca la vita
mi la jucava spissu a paru e sparu
truvava avanti a mia lu stessu muru.
Vita di campagnolu!
ricordi ca rimovunu
l'ansii e l'amarizzi.
Calvariu di tannu
strittu compagnu di li me pinzeri.