MA MATRI

Chjiù ti talìù
curcàta ni lu lièttu
chjiù piènsu
a cuòmu
avìssi a fari senza
di tìa, matrùzza mia
ca tantu facìsti 
ppi mìa
e ammèci jiu
nun puòzzu fari nènti.
Ti vijiu sòffriri
ogni gnuòrnu un dulùri,
na vòta ni la spaddra,
na vota ni la testa
n'atra vota ni li diènti.
Ma tu, silinziusa
cuòmu sempri,
nun ti lamiènti
e nun mi dici nènti.
A cinquant'anni
ti vajiu circànnu
cuòmu na uglja persa
e mi doli lu cori
a vìdiri 
ca ti va astutànnu
cuòmu na cannìla
a picca a picca.
E prijeiu lu Signuri
di fariti stari a la dritta
ancòra tanticchièddra
pirchì si ma matri e
anchi si vicchiarèddra
si ancòra bèddra
e mi duni lu sciatu
ppi jiri sempri avànti.
Si fussi jiu
lu Patri Etèrnu
ti facissi
campari
… cent'anni.