'Nun vidi celu, quannu si scurusu
com'è scurusu lu munnu sutta a tia?
'Nun vidi celu, celu lacrimusu
comu ogni cori ca 'nterra lacrimia!

Talia, celu sutta sta pinnata
c'è n'acidduzzu, fermu arripuddutu
chiusi l'aluzzi, la testa arrunchiata
trema, 'nun canta, talia spirdutu.

E' sulu, sulizzu senza compagnia,
lu so nidu è assai luntanu
e fari 'nun po' soccu vurria
moviti, celu, dunaci 'na manu.

Fa luci, fa sirenu, fallu vulari
picchì si vola canta e si svaria
'nun pensa cchiù, celu, e lu pinsari
sempri è chiantu pi l'anima chi pinia.