SVIGGHIARI LI MENTI

Li nostri vucchi accucchianu paroli 
chi toccanu li cori addummisciuti, 
chi, caminanu formanu violi 
'ntra terri senza tempu scanusciuti.
Sunnu paroli frischi e 'ncuddurìati 
chi parranu a li genti camuluti, 
li spincinu a nun fari li 'ntamati 
virennu comu sunnu arridduciuti.
Sunnu paroli ditti a cu' li senti, 
a cu' si movi sulu si l'ammutti, 
sunnu diretti a 'stranii e canuscenti,
a chiddu chi t'ascuta 
e 'un si nni futti.
Li nostri occhi chini di la luci 
talianu 'ssi vucchi 'nzuccarati; 
l'aricchi vivi sentinu 'ssi vuci 
chi svigghianu li menti rifardati.
Si leva, forti e chiara, la spiranza, 
si viri l'orizzonti allucintari,
si senti comu un cantu 'n luntananza 
chi fa li nostri sensi arripigghiari.